Oktubre 30, 2020. Biyernes ng Ika-30 Linggo sa Karaniwang Panahon.
UNANG PAGBASA
Filipos 1, 1-11
Ang simula ng sulat ni Apostol San Pablo sa mga taga-Filipos
Mula kina Pablo at Timoteo, mga alipin ni Kristo Hesus –
Sa mga taga-Filipos na hinirang ng Diyos at nananalig kay Kristo Hesus, gayun din sa mga tagapangasiwa at sa mga tagapaglingkod:
Sumainyo nawa ang pagpapala at kapayapaan ng Diyos na ating Ama at ng Panginoong Hesukristo.
Nagpapasalamat ako sa Diyos tuwing maaalaala ko kayo. Ang aking mga panalangin para sa inyo ay laging puspos ng kagalakan dahil sa inyong tulong sa pagpapalaganap ng Mabuting Balita tungkol kay Kristo, mula nang ito’y inyong tanggapin hanggang sa kasalukuyan. Tinitiyak ko sa inyong ang mabuting gawa na pinasimulan sa inyo ng Diyos ay kanyang lulubusin hanggang sa Araw ng pagbabalik ni Kristo Hesus. Marapat lamang na pahalagahan ko kayo nang ganito, sapagkat kayo’y mahal sa akin. Naging kahati ko kayo sa mga pagpapala ng Diyos noon pa mang ako’y nagtatanggol at nagpapalaganap ng Mabuting Balita, maging ngayong nakabilanggo ako.
Nalalaman ng Diyos na ang pananabik ko sa inyo ay kasinlaki ng pagmamahal sa inyo ni Kristo Hesus.
Idinadalangin ko sa Diyos na mag-ibayo ang inyong pag-ibig at masangkapan ng malinaw na pagkakilala at malawak na pagkaunawa upang mapili ninyo ang pinakamahalaga sa lahat ng bagay. Sa gayun, pagdating ng Araw ng pagbalik ni Kristo, masumpungan kayong malinis, walang kapintasan, at puspos ng magagandang katangiang kaloob sa inyo ni Hesukristo, sa karangalan at kapurihan ng Diyos.
Ang Salita ng Diyos.
SALMONG TUGUNAN
Salmo 110, 1-2. 3-4. 5-6
Gawa’y napakadakila ng Panginoong Lumikha.
o kaya: Aleluya.
Buong puso siyang pasasalamatan,
aking pupurihin sa gitna ng bayan
kasama ng mga lingkod na hinirang.
Napakadakila ang gawa ng Diyos,
pinananabikan ng lahat ng lingkod.
Gawa’y napakadakila ng Panginoong Lumikha.
Lahat niyang gawa’y dakila at wagas,
bukod sa matuwid hindi magwawakas.
Hindi inaalis sa ating gunita,
na siya’y mabuti’t mahabaging lubha.
Gawa’y napakadakila ng Panginoong Lumikha.
Sa may pagkatakot pagkai’y sagana;
pangako ng Poon ay hindi nasisira.
Ipinadama n’ya sa mga hinirang,
ang kapangyarihan niyang tinataglay,
nang ibigay niya lupa ng dayuhan.
Gawa’y napakadakila ng Panginoong Lumikha.
ALELUYA
Juan 10, 27
Aleluya! Aleluya!
Ang tinig ko’y pakikinggan
ng kabilang sa ‘king kawan,
ako’y kanilang susundan.
Aleluya! Aleluya!
MABUTING BALITA
Lucas 14, 1-6
Ang Mabuting Balita ng Panginoon ayon kay San Lucas
Isang Araw ng Pamamahinga, si Hesus ay inanyayahang kumain sa bahay ng isang pinuno ng mga Pariseo; at binabantayan nilang mabuti ang kanyang mga kilos. Lumapit kay Hesus ang isang taong namamanas. Kaya’t tinanong niya ang mga Pariseo at ang mga dalubhasa sa Kautusan, “Naaayon ba sa Kautusan ang magpagaling sa Araw ng Pamamahinga o hindi?” Ngunit hindi sila umimik, kaya hinawakan ni Hesus ang maysakit, pinagaling saka pinayaon. Pagkatapos, sinabi niya sa kanila, “Kung kayo’y may anak o bakang mahulog sa balon, hindi ba ninyo iaahon kahit Araw ng Pamamahinga?” At hindi sila nakasagot sa tanong na ito.
Ang Mabuting Balita ng Panginoon.
Pagninilay:
Isang mapagpalang Biyernes po sa ating lahat! Kahit anong gawin ng ating Panginoon ay masama para sa kanila. Ang Diyos na walang kapintasan. Ang Diyos nating perpekto na may gawa ng lahat. Tayo rin, kahit gaano tayo kabuti, mayroon at mayroong masasabi ang ibang tao sa atin. Dapat ba tayong makinig? Tuluyan lang tayo na gumawa ng mabuti. Huwag papasukin ang negatibo sa ating puso. Mahalaga na alam nating tama at mabuti ang ating gawain.
Makikita natin na ito ang mamumunga nang maganda sa bandang huli. Ang bunga ng paninira sa kapwa, pagkainggit, pamimintas at paghuhusga gaya ng mga Pariseo ay walang iba kung hindi sama ng loob, pagkalungkot at tuluy-tuloy na pagkagalit at pagkainis. Hindi ito natatapos kung pinipili nating maging negatibo sa kapwa. Ano ba ang rason kung bakit tayo napopoot sa kapwa? Alamin natin ito at aminin. Iwasang maghusga ng kapwa upang tayo ay hindi rin mahusgahan at alalahanin nating ang Diyos ay nananahan sa bawat isa. Kung hinuhusgahan natin ang kapwa, nasasaktan din ang Diyos. Kung tayo ay magiging mapag-unawa, tayo rin ay pagbibigyan at uunawain ng Panginoon.
Pagnilayan natin ito. Amen. +
Pagpalain po kayo ng Mapagmahal at Makapangyarihang Diyos ngayon at magpakailanman. Amen. +
Reflections By: Frances Mary Margaret DJ
Readings Source: Tagalog Mass Readings © Awit at Papuri Communications www.awitatpapuri.com
Tulungan ninyo po kaming ipahayag ang Salita ng Diyos! Salamat po and God bless!
