Marso 11,2021. Huwebes sa Ika-3 Linggo ng Apatnapung Araw na Paghahanda
UNANG PAGBASA
Jeremias 7, 23-28
Pagbasa mula sa aklat ni propeta Jeremias
Sinasabi ng Panginoon: “Inutusan ko ang mga tao na sumunod sa akin upang sila’y maging aking bayan at ako naman ang Diyos nila. Sinabi kong mamuhay sila ayon sa ipinag-uutos ko, at sila’y mapapanuto. Ngunit hindi sila tumalima ayaw nilang makinig sa akin. Sa halip, ginawa nila ang balang maibigan at lubusang nagpakasama, sa halip na magpakabuti. Mula nang lumabas sa Egipto ang inyong mga ninuno hanggang sa araw na ito, patuloy akong nagsugo ng aking mga alipin, ang mga propeta. Subalit hindi ninyo sila pinakinggan ni pinahalagahan. Nagmatigas kayo at masahol pa ang ginawa ninyo kaysa ginawa ng inyong mga ninuno.
“Jeremias, sasabihin mo ang lahat ng ito sa kanila subalit hindi sila makikinig sa iyo. Tatawagin mo sila ngunit hindi ka nila papansinin. Kaya ganito ang sabihin mo sa kanila: ‘Narito ang bansang ayaw makinig sa tinig ng Panginoon kanilang Diyos, at ayaw ituwid ang kanilang landas. Naglaho na sa kanila ang katotohanan at di man lamang nababanggit.’”
Ang Salita ng Diyos.
SALMONG TUGUNAN
Salmo 94, 1-2. 6-7. 8-9
Panginoo’y inyong dinggin, huwag n’yo s’yang salungatin.
MABUTING BALITA
Lucas 11, 14-23
Ang Mabuting Balita ng Panginoon ayon kay San Lucas
Noong panahong iyon, pinalayas ni Hesus ang isang demonyong sanhi ng pagkapipi ng isang lalaki, at ito’y nakapagsalita na mula noon. Nanggilalas ang mga tao, ngunit may ilan sa kanila ang nagsabi, “Si Beelzebul na prinsipe ng mga demonyo ang nagbigay sa kanya ng kapangyarihang magpalayas ng mga demonyo.” May iba namang nais siyang subukin, kaya’t nagsabi, “Magpakita ka ng kababalaghang magpapakilala na ang Diyos ang sumasaiyo.” Ngunit batid ni Hesus ang kanilang iniisip, kaya’t sinabi sa kanila, “Babagsak ang bawat kahariang nahahati sa magkakalabang pangkat at mawawasak ang mga bahay roon. Kung maghimagsik si Satanas laban sa kanyang sarili, paano mananatili ang kanyang kaharian? Sinasabi ninyong nagpapalayas ako ng mga demonyo sapagkat binigyan ako ni Beelzebul ng kapangyarihang ito. Kung ako’y nagpapalayas ng mga demonyo sa pamamagitan ni Beelzebul, sino naman ang nagbigay ng kapangyarihan sa inyong mga tagasunod na makagawa ng gayun? Sila na rin ang nagpapatunay na maling-mali kayo. Ngayon, kung ako’y nagpapalayas ng mga demonyo sa pamamagitan ng kapangyarihan ng Diyos, nangangahulugang dumating na sa inyo ang paghahari ng Diyos.
“Kapag ang isang taong malakas at nasasandatahan ay nagbabantay sa kanyang bahay, malayo sa panganib ang kanyang ari-arian. Ngunit kung salakayin siya at talunin ng isang taong higit na malakas, sasamsamin nito ang mga sandatang kanyang inaasahan at ipamahagi ang ari-ariang inagaw.
“Ang hindi panig sa akin ay laban sa akin, at nagkakalat ang hindi tumutulong sa aking mag-ipon.”
Ang Mabuting Balita ng Panginoon.
Pagninilay:
Isang mapagpalang Huwebes po sa ating lahat! Kahit gaano kabuti ang ginagawa ni Jesus, Siya pa rin ang masama sa mata ng iba. Pamilyar ba sa inyo? Naranasan ninyo na ba ito? Ganito nga ang malimit na mangyari sa kung sino man ang gustong magsilbi sa Diyos. Lagi tayong may makakaaway o hindi makakasundo kahit wala naman tayong ginagawang masama. Subalit ano ang mahalaga? Mahalaga ba ang sabihin nila? Sinagot ni Jesus ang kanilang paratang subalit hindi Siya naapektuhan. Tuloy tuloy ang paggawa Niya ng mabuti.
Tayong mga Kristiyanong mahina ay humingi ng tulong sa Diyos na maging matibay sa kabila ng mga taong hindi maganda ang iniisip at sinasabi sa atin. Patawarin natin sila at nawa ay magkaroon tayo ng lakas na tuloy tuloy pa ring gawin ang tama. Hindi ibinalik ng Diyos ang insulto. Ipinaliwanag lang Niya nang maayos at sa gayong hindi Siya nagkasala. Subalit tayo kapag nasasaktan ay nagagalit din. Kailangang humingi tayo ng grasya mula sa Diyos upang kahit may mag-usig sa atin ay walang lumabas na masama sa ating isip at bibig. Dahil ito ang tunay na tanda ng Kristiyano. Nagpapatawaran sa gitna ng kahinaan at kasalanan. Gaya ng ginawa ni Jesus sa atin. Amen. +
Pagnilayan natin ito. Amen. +
Pagpalain po kayo ng Mapagmahal at Makapangyarihang Diyos ngayon at magpakailanman. Amen. +
Reflections By: Frances Mary Margaret DJ
Readings Source: Tagalog Mass Readings © Awit at Papuri Communications www.awitatpapuri.com