Mayo 10, 2021. Lunes sa Ika-6 na Linggo ng Pasko ng Pagkabuhay.
Subscribe to Awit at Papuri Communications YouTube Channel
Monday of the Sixth Week of Easter (White).
UNANG PAGBASA
Mga Gawa 16, 11-15
Pagbasa mula sa Mga Gawa ng Mga Apostol
Mula sa Troas, tuluy-tuloy kaming naglayag patungong Samotracia, at kinabukasa’y sa Neapolis. Mula roo’y nagtungo kami sa Filipos, isang kolonyang Romano at pangunahing lungsod sa dakong iyon ng Macedonia. Nanatili kami roon ng ilang araw. At nang Araw na Pamamahinga, lumabas kami ng lungsod at nagpunta sa tabing-ilog, sa isang pook na inakala naming dakong panalanginan ng mga Judio. Naupo kami at nakipag-usap sa mga babaing nagkakatipon doon. Kabilang dito ang isang nagngangalang Lydia, taga-Tiatira at mangangalakal ng mga telang purpura. Siya’y may takot sa Diyos. Binuksan ng Panginoon ang kanyang isip at siya’y naniwala sa ipinangangaral ni Pablo. Nagpabinyag siya, at ang mga kasambahay niya. Pagkatapos, sinabi niya, “Kung itinuturing po ninyo akong tapat na lingkod ng Panginoon, doon na kayo tumuloy sa amin.” Mahigpit ang kanyang anyaya kaya’t hindi namin napahindian.
Ang Salita ng Diyos.
SALMONG TUGUNAN
Salmo 149, 1-2. 3-4. 5-6a at 9b
Panginoo’y nagagalak
sa hirang n’yang mga anak.
o kaya: Aleluya!
MABUTING BALITA
Juan 15, 26 – 16, 4a
Ang Mabuting Balita ng Panginoon ayon kay San Juan
Noong panahong iyon, sinabi ni Hesus sa kanyang mga alagad: “Ngunit ang Patnubay, ang Espiritu ng Katotohanan, ang paparito mula sa Ama. Susuguin ko siya sa inyo buhat sa Ama, at siya ang magpapatotoo tungkol sa akin. At magpapatotoo rin kayo tungkol sa akin, sapagkat sa pasimula pa’y kasama ko na kayo.
“Sinasabi ko ito sa inyo upang huwag kayong mawalan ng pananalig sa akin. Palalayasin nila kayo sa mga sinagoga. Darating ang panahon na ang sinumang pumatay sa inyo ay mag-aakalang naglilingkod siya sa Diyos. At gagawin nila ito sapagkat hindi nila ako nakikilala ni ang Ama. Ito’y sinasabi ko sa inyo upang, pagdating ng oras na gawin nila, maalaala ninyong ipinagpauna ko na ito sa inyo.”
Ang Mabuting Balita ng Panginoon.
Pagninilay:
Isang mapagpalang Lunes po sa ating lahat! Ang Panginoon natin ay malapit nang umakyat sa langit sa pagninilay natin sa Ebanghelyo. Marami tayong daranasing hirap ngunit hindi tayo susuko. Sa pag-akyat ng Panginoon sa langit ay hindi Niya tayo iniwan. Darating ang Espiritu Santo at nasa atin na nga ngayon na Siyang magtatanggol sa atin at magiging gabay natin sa lahat ng bagay. Manalangin tayo sa Kanya at dumepende sa Diyos Espiritu Santo upang malaman at magawa natin ang kalooban ng Diyos. Lagi nating kasama ang Diyos at hindi Siya nawawala. Kung mananalangin tayo at maniniwala, makikita natin Siya at ang Kanyang pagpapala ay darating sa sinumang magtitiyaga kahit mahirap na. Amen. +
Pagnilayan natin ito. Amen. +
Pagpalain po kayo ng Mapagmahal at Makapangyarihang Diyos ngayon at magpakailanman. Amen. +
Reflections By: F.M.M.J.
Readings Source: Tagalog Mass Readings © Awit at Papuri Communications www.awitatpapuri.com
