Mayo 26, 2025
MABUTING BALITA
Juan 15, 26 – 16, 4a
Ang Mabutinbg Balita ng Panginoon ayon kay San Juan
Noong panahong iyon, sinabi ni Hesus sa kanyang mga alagad: “Ngunit ang Patnubay, ang Espiritu ng Katotohanan, ang paparito mula sa Ama. Susuguin ko siya sa inyo buhat sa Ama, at siya ang magpapatotoo tungkol sa akin. At magpapatotoo rin kayo tungkol sa akin, sapagkat sa pasimula pa’y kasama ko na kayo.
“Sinasabi ko ito sa inyo upang huwag kayong mawalan ng pananalig sa akin. Palalayasin nila kayo sa mga sinagoga. Darating ang panahon na ang sinumang pumatay sa inyo ay mag-aakalang naglilingkod siya sa Diyos. At gagawin nila ito sapagkat hindi nila ako nakikilala ni ang Ama. Ito’y sinasabi ko sa inyo upang, pagdating ng oras na gawin nila, maalaala ninyong ipinagpauna ko na ito sa inyo.”
Ang Mabuting Balita ng Panginoon.
Pagninilay:
Hindi madali ang sumunod kay Hesus sapagkat ang mundo ay taliwas dito. Ang tuon ng mundo ay sa sarili at kung ano ang makukuha natin mula rito. Sa paglilingkod sa Diyos ay iba. Laging para sa ibang tao ang uunawain at sa pag-unawang ito ng iba, mas matatagpuan natin ang tunay na kapayapaan at magpupuno sa atin.
Kaya nga upang maggawa natin ito at ang misyon natin para sa tao, kailangan natin ng patnubay ng Espiritu Santo. Nagdarasal ba tayo sa Kanya?
Siya ang magtuturo sa atin kung ano ang gagawin at gagabay sa atin. Kung mananalangin tayo ng mula sa puso, at tatahimik matapos, may sagot ang Panginoon sa atin. Ang Espiritu Santo ay nasa ating puso. Sasagot Siya kung ating tatanungin dahil ang Diyos ay buhay at laging nakikinig sa atin. Amen. +
Pagninilay ni: F.M.M.J.
Pinagmulan ng Pagbasa: Tagalog Mass Readings © Awit at Papuri Communications
