Setyembre 30, 2020. Paggunita kay San Jeronimo, pari at pantas ng Simbahan. Miyerkules ng Ika-26 na Linggo sa Karaniwang Panahon.
UNANG PAGBASA
Job 9, 1-12. 14-16
Pagbasa mula sa aklat ni Job
Ang sagot ni Job sa kanyang mga kaibigan:
“Iyan ay dinig ko na noon pa mang una,
ngunit sinong tao kaya ang tatalo sa kanya?
Sino ang sa kanya’y maaaring mangatwiran?
Sa sanlibo niyang tanong, di masagot ang isa man.
Ang Diyos ay matalino at makapangyarihan,
sino kaya ang sa kanya ay makalalaban?
Walang sabi-sabing inuuga yaong bundok,
sa tindi ng kanyang galit, ito’y kanyang dinudurog.
Itong sangkalupaan ay kanyang nayayanig.
At nauuga niya ang saligan ng daigdig.
Napipigil sa pagsikat ang silahis nitong araw,
At kanyang naitatago ang tala sa kalangitan.
Siya lamang ang lumikha sa sangkalangitan,
at sa bangis nitong dagat, walang ibang makasaway.
Ang “Malaking Diper” at “Orion” ay siya lamang ang may lalang,
pati na ang Pleyades at mga kumpol na bituin sa timugan.
Makapangyarihan niyang gawa ay hindi maunawaan,
ang milagrong gawa niya sa dami ay di mabilang.
Siya’y nagdaraan ngunit di ko mamalas,
siya’y hindi ko makita, bagaman ay naglalakad.
Anuman ang gawin niya ay walang makahahadlang,
ni makapagtatanong, ‘Bakit mo ginawa iyan?
Anong aking isasagot sa kanyang katanungan?
Kahit ako walang sala ang tangi kong magagawa’y
sa harap ng Diyos na hukom manikluhod akong tunay.
Kahit niya bayaang ako’y makapagsalita,
di ko rin natitiyak kung ako’y diringgin kaya.
Ang Salita ng Diyos.
SALMONG TUGUNAN
Salmo 87, 10bk-11. 12-13. 14-15
Panginoon, ako’y dinggin sa pagsamo ko’t dalangin.
Panginoong Diyos,
tumatawag ako sa ‘yo araw-araw,
sa pagdalangin ko ay taas ang kamay.
Makagagawa ba
ikaw, Panginoon, ng kababalaghan,
para purihin ka niyong mga patay?
Panginoon, ako’y dinggin sa pagsamo ko’t dalangin.
Ang pag-ibig mo ba
doon sa libinga’y ipinapahayag,
o sa kaharian
niyong mga patay ang ‘yong pagtatapat?
Doon ba sa dilim
ang dakilang gawa mo ba’y makikita,
o ang pagliligtas
sa mga lupaing wala nang pag-asa?
Panginoon, ako’y dinggin sa pagsamo ko’t dalangin.
O sa iyo, O Poon,
ako’y nananangis at nananawagan,
sa tuwing umaga
ako’y tumatawag sa iyong harapan.
Di mo ako pansin,
O Panginoon ko, di ka kumikibo,
bakit ang mukha mo’y
ikinukubli mo, ika’y nagtatago?
Panginoon, ako’y dinggin sa pagsamo ko’t dalangin.
ALELUYA
Filipos 3, 8-9
Aleluya! Aleluya!
Tana’y aking tatalikdan
upang si Kristo’y makamtan
bilang tanging pakinabang.
Aleluya! Aleluya!
MABUTING BALITA
Lucas 9, 57-62
Ang Mabuting Balita ng Panginoon ayon kay San Lucas
Noong panahong iyon, samantalang naglalakad sina Hesus at ang kanyang mga alagad, may taong nagsabi kay Hesus, “Susunod po ako sa inyo kahit saan.” Sumagot si Hesus, “May lungga ang asong-gubat at may pugad ang ibon, ngunit ang Anak ng Tao’y wala man lamang matulugan o mapagpahingahan.” Sinabi ni Hesus sa isa, “Sumunod ka sa akin.” Ngunit sumagot ang tao, “Panginoon, hayaan po muna ninyo akong umuwi upang ipalibing ang akin ama.” Sinabi ni Hesus sa kanya, “Ipaubaya mo na sa mga patay ang paglilibing ng kanilang mga patay. Ngunit ikaw, humayo ka at ipahayag mo ang tungkol sa paghahari ng Diyos.” Sinabi naman ng isa, “Susunod po ako sa inyo, Panginoon, ngunit magpapaalam muna ako sa aking mga kasambahay.” Sinabi sa kanya ni Hesus, “Ang sinumang nag-aararo at palaging lumilingon ay hindi karapat-dapat sa paghahari ng Diyos.”
Ang Mabuting Balita ng Panginoon.
Pagninilay:
Maligayang Kapistahan po ni San Geronimo! Tiyak nga namang mahirap sumunod kay Jesus. Kinakailangan mong iwanan ang lahat, at italaga ang sarili sa iisang misyon – ang pagpapahayag ng paghahari ng Panginoon. Ang lahat ng iba ay ikalawa na lamang. Madaling sabihin ngunit mahirap gawin. Subalit walang imposible sa Panginoon. Natunghayan natin sa Unang Pagbasa kung paanong pinupuri pa rin ni Job ang Diyos. Ipinapahayag niya ang pagkakakilala niya sa Diyos na siya namang katotohanan, sa kabila ng kanyang paghihirap. Lahat ay kayang gawin ng Diyos. Naniniwala ba tayo dito?
Gaano man tayo kahina at kabalisa, kahit sa tingin natin ay hindi natin kayang sumunod sa Panginoon dahil sa dami ng gumugulo sa ating isipan, hingiin natin ang tulong ng Diyos at magpakababa sa Kanya. Sa tuwing susunod tayo sa Diyos, napakaraming pagsubok na kailangang harapin. Maraming gagambala at maraming ibang aalahaning lalapit sa atin. Dapat marunong tayong tumigil sumandali at manalangin upang makita kung ano ang ibig ng Diyos na ating gawin. Pari man, madre, o laiko – saan mang estado ng buhay pare-pareho tayong may hinaharap sa ating kanya-kanyang bokasyon at misyon – ang pagsunod sa Diyos. Sinasabi ni Jesus na higit na mas mahalaga ang pagsunod sa Diyos kaysa sa anumang bagay. Nakakapagod ito minsan at halos walang pahinga ngunit kung pinagninilayan natin ang napakahalagang misyon na ito na tungo sa pagsalba ng mga kaluluwa, pipiliin nating manatili at sumunod kahit mahirap at kahit sinusubok tayo.
Unahin nawa natin ang Diyos araw-araw, huwag tayong matakot ibigay ang ating sarili sa Kanya nang buo. Nawa ay kahit ano pa man ang kanyang hilingin sa atin, ay maging matapang tayo na mag-“oo”. Sapagkat ang ating gantimpala ay kayamanan at kaligayahang walang hanggan. Iyong hindi natin iiwanan hindi tulad ng dito sa lupa na maiiwan lamang pagkamatay – at ang mga yamang ito ay sa langit, ang ating permanenteng tahanan kasama ni Jesus. Ano ngayon ang ating pipiliin? Tanungin natin ang ating sarili. Nawa araw-araw ay piliin nating unahin ang Diyos. Amen. +
Pagnilayan natin ito. Amen. +
Pagpalain po kayo ng Mapagmahal at Makapangyarihang Diyos ngayon at magpakailanman. Amen. +
Reflections By: Frances Mary Margaret DJ
Readings Source: Tagalog Mass Readings © Awit at Papuri Communications www.awitatpapuri.com
